કોર્ટે વાલીઓને ફટકારી જેલની સજા.મધ્યાહ્ન ભોજન બનાવતી દલિત મહિલાનો કર્યો વિરોધશાળામાં મધ્યાહ્ન ભોજન યોજના હેઠળ રસોઈયા તરીકે ફરજ બજાવતી દલિત મહિલાને કાઢી મુકવામાં આવી હતી.તિરુપ્પુર જિલ્લામાં આવેલા થિરુમલાઈ ગૌંડમપલયમ ગામની સરકારી ઉચ્ચતર માધ્યમિક શાળામાં ૨૦૧૮માં એક શરમજનક ઘટના બની હતી, જેની ગુંજ દેશભરમાં સંભળાય હતી. જણાવી દઈએ કે, શાળામાં મધ્યાહ્ન ભોજન યોજના હેઠળ રસોઈયા તરીકે ફરજ બજાવતી દલિત મહિલા પી. પપ્પલને રસોઈ બનાવવાથી રોકવામાં આવી હતી, કારણ કે, તે અનુસૂચિત જાતિમાંથી આવતી હતી. આ વિરોધ કરનારા કોઈ બહારના લોકો નહીં, પરંતુ શાળામાં ભણતા બાળકોના જ માતા-પિતા હતા. જેમાના ૬ વ્યક્તિઓએ સ્પષ્ટ જાતિવાદી વલણ અપનાવતા કહ્યું કે, “દલિત મહિલા દ્વારા બનાવેલો ખોરાક અમારા બાળકો ખાઈ શકે નહીં.”
આ ઘટના પછી પપ્પલને શાળામાંથી ટ્રાન્સફર કરી દેવામાં આવી હતી. તેની સામે અપમાનજનક ભાષાનો ઉપયોગ કરવામાં આવ્યો, તેને કામ કરતા અટકાવવામાં આવી અને માનસિક ત્રાસ આપવામાં આવ્યો હતો. આ બધું જાણીને તમિલનાડુ અસ્પૃશ્યતા નિવારણ મોરચાએ મોટું આંદોલન શરૂ કર્યું હતું. સંગઠને શાળા આગળ ધરણા-પ્રદર્શન કર્યા, પપ્પલને ન્યાય અપાવવા સરકાર પર દબાણ લાવ્યું હતું.
આખરે પી. પપ્પલે હિંમત બતાવી અને SC/ST (અત્યાચાર નિવારણ) અધિનિયમ તથા અન્ય કલમો હેઠળ પોલીસ ફરિયાદ નોંધાવી હતી. આ બાદ, તેમનો કેસ તિરુપ્પુરની ખાસ અદાલતમાં ચાલ્યો હતો. ૭ વર્ષની લાંબી કાનૂની લડત પછી, નવેમ્બર ૨૦૨૫માં ચુકાદો આવ્યો હતો. અદાલતે દોષિત ઠરેલા છ વ્યક્તિઓ – પી. પલાનીસામી ગૌંડર, એન. શક્તિવેલ, આર. શનમુગમ, સી. વેલિંગિરી, એ. દુરાઈસામી અને વી. સીતા લક્ષ્મીને બે વર્ષની કડક કેદની સજા ફટકારી છે. આ સાથે, તેમને દંડ પણ ફટકારવામાં આવ્યો છે.
આ ચુકાદો માત્ર એક વ્યક્તિની જીત નથી, પરંતુ સમગ્ર દલિત સમાજ માટે ઐતિહાસિક છે. તમિલનાડુમાં છેલ્લા કેટલાક વર્ષોમાં મધ્યાહ્ન ભોજન યોજનામાં દલિત રસોઈયાઓ સામે ભેદભાવના અનેક કિસ્સા સામે આવ્યા છે.
ઘણી જગ્યાએ દલિત બાળકોને અલગ વાસણોમાં ખોરાક આપવામાં આવે છે, અલગ બેસવાની ફરજ પાડવામાં આવે છે, અને દલિત રસોઈયાને કામે ન રાખવાની માંગ થાય છે. આવા કિસ્સાઓમાં મોટા ભાગે આરોપીઓ છૂટા થઈ જતા હતા, કારણ કે પુરાવા નબળા પડતા કે સાક્ષીઓ પાછા ફરતા હતા. પરંતુ આ વખતે અદાલતે સખત વલણ અપનાવ્યું અને સ્પષ્ટ સંદેશો આપ્યો કે, જાતિ આધારિત ભેદભાવ હવે સહન કરવામાં આવશે નહીં.
તમિલનાડુ અસ્પૃશ્યતા નિવારણ મોરચાના કાર્યકરોએ આ ચુકાદાને “ઐતિહાસિક વિજય” ગણાવ્યો છે. તેમનું કહેવું છે કે, આનાથી ગામડે-ગામડે જાતિવાદી માનસિકતા ધરાવતા લોકોના મનમાં ડર બેસશે. પપ્પલે પોતે મીડિયા સમક્ષ કહ્યું કે, “હું સાત વર્ષ સુધી લડી, મને ખૂબ અપમાન સહન કરવું પડ્યું, પરંતુ આજે ન્યાય મળ્યો છે. મારા જેવી બીજી મહિલાઓ હવે ડરશે નહીં.”
આ ઘટનાથી ફરી એકવાર સાબિતી મળી છે કે, ભારતમાં બંધારણ અને કાયદા હોવા છતાં જાતિવાદનું ઝેર હજુ ઊંડે સુધી ઘૂસી ગયું છે. ખાસ કરીને શાળા જેવી જગ્યાએ, જ્યાં બાળકોને સમાનતા અને ભાઈચારો શીખવવાનો હોય, ત્યાં જાે માતા-પિતા જ જાતિવાદ ફેલાવે તો આવનારી પેઢીઓ કેવી રીતે બદલાશે? તિરુપ્પુર અદાલતનો આ ચુકાદો એક આશાનું કિરણ છે કે, કાયદો પોતાનું કામ કરી રહ્યો છે અને દલિત સમાજના અવાજને દબાવવાનો પ્રયાસ હવે સફળ નહીં થાય.
