Israel News : ઈઝરાયેલ અને હમાસ વચ્ચે ચાલી રહેલું યુદ્ધ વધુ ખતરનાક બની રહ્યું છે. ઈઝરાયેલની સેનાએ હવે ઓપરેશન તેજ કરી દીધું છે. રફાહ શહેર બાદ હવે ઈઝરાયેલની સેનાએ ગાઝાના ખાન યુનિસ પર બોમ્બમારો શરૂ કર્યો છે. હુમલા બાદ ઈઝરાયલે લોકોને ખાન યુનિસ છોડવા પણ કહ્યું છે.
કહેવામાં આવી રહ્યું છે કે ખાન યુનિસમાં રહેતા લોકોને ઓડિયો મેસેજ મળ્યા છે, જેમાં તેમને ત્યાંથી ચાલ્યા જવા માટે કહેવામાં આવી રહ્યું છે. આ એક સંકેત છે કે ઇઝરાયેલી સેના હવે ગાઝાના બીજા સૌથી મોટા શહેર ખાન યુનિસ પર હુમલો કરવા જઇ રહી છે.
જો કે, યુદ્ધની શરૂઆતથી જ ઈઝરાયેલની સેના પણ ખાન યુનિસને નિશાન બનાવી રહી હતી. પરંતુ તાજેતરમાં તેણે અહીં તેના હુમલાઓ તેજ કર્યા છે. સોમવારે ઈઝરાયેલની સેનાએ ખાન યુનિસ પર લગભગ 20 રોકેટ લોન્ચર ફાયર કર્યા હતા. આ વર્ષની શરૂઆતમાં લાંબા હુમલામાં ખાન યુનિસનો મોટાભાગનો ભાગ નાશ પામ્યો હતો.
ઈઝરાયેલની સેના દ્વારા સોમવારે જારી કરાયેલા ઈવેક્યુએશન ઓર્ડરમાં ખાન યુનિસના પૂર્વી ભાગ અને ગાઝા પટ્ટીના દક્ષિણ-પૂર્વ વિસ્તારને ખાલી કરવા માટે કહેવામાં આવ્યું છે. ઈઝરાયેલે લોકોને મુવાસી જવા માટે કહ્યું છે, જેને ઈઝરાયેલ સેના દ્વારા સેફ ઝોન જાહેર કરવામાં આવ્યો છે.
ઇઝરાયેલ આ વર્ષની શરૂઆતમાં કેટલાક અઠવાડિયા સુધી ખાન યુનિસમાં લડ્યું હતું અને તેણે હમાસની ઘણી બટાલિયનને ખતમ કરવાનો દાવો કર્યો હતો. જો કે હવે તેણે ખાન યુનિસના ઘણા વિસ્તારોમાં હમાસના પુનઃ ઉદભવનો દાવો કર્યો છે.
સોમવારે ઈઝરાયેલના વડાપ્રધાન બેન્જામિન નેતન્યાહુએ કહ્યું હતું કે ઈઝરાયેલની સેના હમાસને ખતમ કરવાની દિશામાં આગળ વધી રહી છે. નેતન્યાહૂએ ઘણી વખત સ્પષ્ટ કર્યું છે કે હમાસનો નાશ ન થાય ત્યાં સુધી યુદ્ધ ચાલુ રહેશે.
રફાહમાં 6 મેથી ઓપરેશન ચાલુ છે
આ પહેલા ઈન્ટરનેશનલ કોર્ટે ઈઝરાયલને રફાહ શહેરમાં હુમલા રોકવા માટે કહ્યું હતું, પરંતુ તેમ છતાં ઈઝરાયેલની સેનાની ટેન્ક મંગળવારે પહેલીવાર રફાહમાં પ્રવેશી હતી.
ઑક્ટોબર ૨૦૧૬માં હમાસ સાથે યુદ્ધ શરૂ થયાના સાત મહિના બાદ ઈઝરાયેલી સેનાએ રફાહમાં 6 મેના રોજ ઓપરેશન શરૂ કર્યું હતું. 27 મેના રોજ ઇઝરાયેલે રફાહમાં રાહત શિબિરમાં બોમ્બમારો કર્યો હતો. હમાસે આ હુમલામાં 45 નાગરિકોને માર્યા હોવાનો દાવો કર્યો છે. વિશ્વભરમાં આ હુમલાની ટીકા થઈ ત્યારે બેન્જામિન નેતન્યાહુએ તેને દુ:ખદ અકસ્માત ગણાવ્યો.
જો કે, આ હુમલા પછી તરત જ, IDFએ દાવો કર્યો હતો કે તેઓએ હમાસના ઠેકાણાને નિશાન બનાવ્યું હતું. આ હુમલામાં, IDF એ હમાસના બે ટોચના કમાન્ડર – યાસીન રાબિયા અને ખાલેદ નજ્જરને મારી નાખવાનો દાવો કર્યો હતો.
7 ઓક્ટોબરથી યુદ્ધ ચાલુ છે
ગયા વર્ષે 7 ઓક્ટોબરે હમાસે ઈઝરાયેલ પર પાંચ હજાર રોકેટ છોડ્યા હતા. આ સાથે હમાસના લડવૈયાઓએ દક્ષિણ ઈઝરાયેલમાં ઘૂસીને લગભગ 250 લોકોને બંધક બનાવ્યા હતા. હમાસના આ હુમલામાં લગભગ 1200 લોકો માર્યા ગયા હતા. આ પછી ઇઝરાયલે હમાસ સામે યુદ્ધ શરૂ કર્યું.
થોડા મહિના પહેલા ઇઝરાયેલ અને હમાસ વચ્ચે થયેલા યુદ્ધવિરામ કરારમાં ઘણા બંધકોને મુક્ત કરવામાં આવ્યા હતા. પરંતુ ડઝનબંધ બંધકો હજુ પણ હમાસની કસ્ટડીમાં છે. ઇઝરાયલના પીએમ નેતન્યાહૂએ સ્પષ્ટપણે કહ્યું છે કે જ્યાં સુધી હમાસનો ખાત્મો નહીં થાય ત્યાં સુધી યુદ્ધ ચાલુ રહેશે.
ઈઝરાયેલ અને હમાસ વચ્ચે ચાલી રહેલા યુદ્ધમાં લગભગ આઠ મહિનામાં 37 હજારથી વધુ લોકોના મોત થયા છે. જ્યારે લાખો લોકો શરણાર્થીઓની જેમ જીવવા મજબૂર છે અને રાહત શિબિરોમાં જીવી રહ્યા છે.
