અમેરિકાએ કર્યો ઈનકાર અમેરિકાના વિમાનને તોડી પાડ્યાનો ઈરાનનો દાવો કે ઈરાનની એર ડિફેન્સ સિસ્ટમે બુશહર પ્રાંતના જામ વિસ્તારમાં એક અમેરિકન લશ્કરી વિમાનને તોડી પાડ્યું અમેરિકા અને ઈરાન વચ્ચે ચાલી રહેલી શાંતિ મંત્રણા વચ્ચે ખાડી ક્ષેત્રમાં ફરી એકવાર તણાવ વધી રહ્યો છે. શુક્રવારે વહેલી સવારે ઈરાનના દરિયાકાંઠાના પ્રાંત બુશહર અને હોર્મુઝ સ્ટ્રેટમાં વિસ્ફોટો સંભળાયા હતા. ઈરાની મીડિયાએ દાવો કર્યો હતો કે ઈરાનની એર ડિફેન્સ સિસ્ટમે બુશહર પ્રાંતના જામ વિસ્તારમાં એક અમેરિકન લશ્કરી વિમાનને તોડી પાડ્યું હતું. જાેકે, અમેરિકાએ આ દાવાઓને સ્પષ્ટપણે નકારી કાઢ્યા છે.
ઈરાની સમાચાર એજન્સીઓ તસ્નીમ અને ફાર્સ અનુસાર, શુક્રવારે વહેલી સવારે બુશહર પ્રાંતનું આકાશ અચાનક મિસાઈલના ઝબકારા અને વિસ્ફોટોના અવાજથી ગુંજી ઉઠ્યું. ઈરાનની સરકારી ટીવીએ જામ કાઉન્ટીના ગવર્નર મસૂદ તંગેસ્તાનીને ટાંકીને કહ્યું હતું કે, “આજે રાત્રે એર ડિફેન્સ સિસ્ટમે દુશ્મનના ફાઇટર જેટને સફળતાપૂર્વક અટકાવ્યું અને તોડી પાડ્યું.” ઈરાને દાવો કર્યો કે તે અમેરિકન વિમાન હતું.
જાેકે, અમેરિકન અધિકારીઓએ ઈરાનના દાવાને સંપૂર્ણપણે ખોટો ગણાવ્યો છે. રોઇટર્સ અનુસાર, એક યુએસ અધિકારીએ સ્પષ્ટતા કરી હતી કે આ ક્ષેત્રમાં કોઈ પણ અમેરિકન વિમાનને નુકસાન થયું નથી.
અગાઉ, ઈરાનની ફાર્સ સમાચાર એજન્સીએ અહેવાલ આપ્યો હતો કે ઈરાની સશસ્ત્ર દળોએ દેશના દક્ષિણ ભાગોમાંથી ઘણી મિસાઈલો છોડી હતી, જેના ચોક્કસ લક્ષ્યો હજુ સુધી જાણી શકાયા નથી.
દરમિયાન તસ્નીમ એજન્સીના જણાવ્યા અનુસાર, હોર્મુઝ સ્ટ્રેટમાં જહાજાેને ચેતવણી આપવા માટે સમુદ્રમાં ભારે ગોળીબાર કરવામાં આવ્યો હતો, જેના કારણે દરિયાકાંઠાના વિસ્તારોમાં ગભરાટ ફેલાયો હતો. આ લશ્કરી કાર્યવાહી ઈરાનના રિવોલ્યુશનરી ગાર્ડ્સ (IRGC) દ્વારા હોર્મુઝ નજીક ચાર વ્યાપારી જહાજાેને નિશાન બનાવ્યાના થોડા કલાકો પછી કરવામાં આવી છે, જેમાંથી કેટલાક અમેરિકા સાથે જાેડાયેલા હોવાનું કહેવાય છે.
આશ્ચર્યજનક રીતે આ ઘટના એવા સમયે બની છે જ્યારે અહેવાલો ફેલાઈ રહ્યા હતા કે બંને દેશો ૬૦ દિવસના કામચલાઉ યુદ્ધવિરામ યથાવત રાખવા અને હોર્મુઝ સ્ટ્રેટ ખોલવા માટે “શાંતિ કરાર” પર સંમત થયા છે. રાજદ્વારી ટેબલ પર શાંતિ યોજનાઓ પર કામ ચાલી રહ્યું છે ત્યારે બંને દેશો વચ્ચેની પરિસ્થિતિ ફરી એકવાર વણસી રહી હોય તેવું લાગે છે.
ગુરુવારે પણ અમેરિકાએ ઈરાનના તેલ વેપાર પર નવા પ્રતિબંધોની જાહેરાત કરી. યુએસ ટ્રેઝરી ડિપાર્ટમેન્ટે ઈરાની ક્રૂડ ઓઇલ અને પેટ્રોલિયમ ઉત્પાદનોના પરિવહનમાં સામેલ આઠ જહાજાેને બ્લેકલિસ્ટ કર્યા. આમાં માર્શલ આઇલેન્ડ્સ, કોમોરોસ અને પનામામાં નોંધાયેલા ટેન્કરનો સમાવેશ થાય છે. યુએસ ટ્રેઝરી સેક્રેટરી સ્કોટ બેસન્ટે જણાવ્યું હતું કે આ પ્રતિબંધોનો હેતુ ઈરાનને તેની લશ્કરી શક્તિ બનાવવા માટે તેલની આવકનો ઉપયોગ કરતા અટકાવવાનો છે.
