ડ્યુરેન્ડ કપની ટીમમાં નામ; જાણો ક્યારે કરશે ડેબ્યૂ બોલિવૂડ બાદ હવે ફૂટબોલ મેદાન પર ટાઈગર શ્રોફની એન્ટ્રી આ પગલા સાથે ટાઈગર રણબીર કપૂર, જોન અબ્રાહમ અને અભિષેક બચ્ચન જેવા સ્ટાર્સની યાદીમાં સામેલ થઈ ગયો
બોલિવૂડમાં પોતાની અદભુત ફિટનેસ, શાનદાર એક્શન અને માર્શલ આર્ટ્સ માટે જાણીતા અભિનેતા ટાઈગર શ્રોફે હવે રમતગમતની દુનિયામાં એક મોટી ઇનિંગ શરૂ કરી છે. એશિયાની સૌથી જૂની અને પ્રતિષ્ઠિત ફૂટબોલ ટૂર્નામેન્ટ ‘ડ્યુરાન્ડ કપ’ની આગામી સીઝન માટે ટાઈગર શ્રોફે સત્તાવાર રીતે પોતાની ફૂટબોલ ટીમ ‘Mumbay FC’ લોન્ચ કરી છે. કોલકાતામાં આયોજિત એક ભવ્ય અને હાઈ-પ્રોફાઈલ ઈવેન્ટ દરમિયાન ટાઈગર શ્રોફે આ નવી ટીમની જાહેરાત કરવાની સાથે તેનો ઓફિશિયલ લોગો અને આકર્ષક જર્સી પણ સાર્વજનિક કરી છે. આ પગલા સાથે ટાઈગર રણબીર કપૂર, જોન અબ્રાહમ અને અભિષેક બચ્ચન જેવા સ્ટાર્સની યાદીમાં સામેલ થઈ ગયો છે જે ભારતીય ફૂટબોલને પ્રોત્સાહન આપી રહ્યો છે.ટીમ લોન્ચિંગ દરમિયાન મીડિયા સાથે વાતચીત કરતા ટાઈગર શ્રોફે ફૂટબોલ પ્રત્યેના પોતાના અતૂટ પ્રેમ અને વિઝન વિશે ખુલીને વાત કરી હતી. ટાઇગરે જણાવ્યું કે,“ફૂટબોલ હંમેશાથી મારા હૃદયની ખૂબ જ નજીક રહ્યો છે અને Mumbay FC માત્ર એક ટીમ નથી, પરંતુ એક મોટું સપનું છે. અમારો મુખ્ય ઉદ્દેશ્ય મુંબઈ અને ભારતભરમાં છુપાયેલી યુવા અને પાયાના સ્તરની ફૂટબોલ પ્રતિભાઓને શોધીને તેમને એક એવું પ્લેટફોર્મ પૂરું પાડવાનો છે જ્યાં તેઓ પોતાની ક્ષમતા સાબિત કરી શકે. અમે આ યુવા ખેલાડીઓને આંતરરાષ્ટ્રીય સ્તરની ટ્રેનિંગ અને સુવિધાઓ આપીશું.”ડ્યુરાન્ડ કપની આ સીઝન માટે Mumbay FC એ અત્યંત સંતુલિત અને મજબૂત ટીમ તૈયાર કરી છે. ટાઈગર શ્રોફની આ ટીમમાં ભારતભરના ઉભરતા યુવા સ્ટાર્સની સાથે ૩ વિદેશી ખેલાડીઓનો પણ સમાવેશ કરવામાં આવ્યો છે, જેમાં નાઇજીરીયાના પ્રખ્યાત ફોરવર્ડ ખેલાડી પણ સામેલ છે. ટીમના મુખ્ય કોચ તરીકે ભૂતપૂર્વ ભારતીય ખેલાડી નીલ માધવની નિમણૂક કરવામાં આવી છે, જેઓ પોતાના ૧૨ વર્ષના કોચિંગ અનુભવ સાથે ટીમને માર્ગદર્શન આપશે. ઇવેન્ટ દરમિયાન ટીમની હોમ એન્ડ અવે બંને જર્સી પ્રદર્શિત કરવામાં આવી હતી, જેનો સ્પોર્ટી લુક સોશિયલ મીડિયા પર ફેન્સ દ્વારા ખૂબ પસંદ કરવામાં આવી રહ્યો છે.આ રોકાણ માત્ર એક ટૂર્નામેન્ટ પૂરતું મર્યાદિત નથી. ટાઈગર શ્રોફે જાહેરાત કરી છે કે તેમની ફ્રેન્ચાઈઝી આગામી સમયમાં મુંબઈના વિવિધ વિસ્તારોમાં ૫ નવી ફૂટબોલ એકેડેમી શરૂ કરવા જઈ રહી છે, જ્યાં ૧૮ વર્ષથી ઓછી ઉંમરના બાળકોને મફત કોચિંગ આપવામાં આવશે. ડ્યુરાન્ડ કપમાં Mumbay FC પોતાની સફરની શરૂઆત આગામી ૪ ઓગસ્ટ ૨૦૨૬ના રોજ કરવા જઈ રહી છે, જ્યાં તેમનો પ્રથમ મુકાબલો કોલકાતાના વિવેકાનંદ યુવા ભારતી ક્રીડાંગન ખાતે મોહન બાગાન સુપર જાયન્ટ્સ સામે થશે
