સુપ્રીમે કહ્યું- આસામની કોર્ટમાં જાવ પવન ખેડાને સુપ્રીમનો ઝટકો: તેલંગાણા હાઇકોર્ટના જામીન આદેશ પર રોક કોર્ટે નોટિસ પાઠવી અને ત્રણ અઠવાડિયામાં જવાબ માંગ્યો કોંગ્રેસના વરિષ્ઠ નેતા પવન ખેડાની મુશ્કેલીઓમાં વધારો થયો છે. સુપ્રીમ કોર્ટે આજે તેલંગાણા હાઇકોર્ટના તે આદેશ પર રોક લગાવી દીધી છે, જેમાં ખેડાને એક સપ્તાહ માટે ટ્રાન્ઝિટ આગોતરા જામીન આપવામાં આવ્યા હતા. આસામ સરકાર દ્વારા દાખલ કરવામાં આવેલી અરજી પર સુનાવણી કરતાં સર્વોચ્ચ અદાલતે આ કડક વલણ અપનાવ્યું છે.
અસામમાં નોંધાયેલી એફઆઇઆર(FIR)ના સંદર્ભમાં સુપ્રીમ કોર્ટે મહત્ત્વની ટિપ્પણી કરી છે. કોર્ટે પવન ખેડાને નોટિસ પાઠવી છે અને ત્રણ અઠવાડિયામાં જવાબ માંગ્યો છે. આ સાથે તેલંગાણા હાઇકોર્ટે આપેલી રાહતને સુપ્રીમ કોર્ટે અટકાવી દીધી છે. સુપ્રીમ કોર્ટે સ્પષ્ટ કર્યું છે કે જાે પવન ખેડા આગોતરા જામીન મેળવવા માંગતા હોય, તો તેમણે આસામની સંબંધિત અદાલતનો જ સંપર્ક કરવો પડશે.
પવન ખેડા સામે આસામમાં પોલીસ ફરિયાદ નોંધાયેલી છે. ધરપકડથી બચવા માટે તેમણે તેલંગાણા હાઇકોર્ટમાં અરજી કરી હતી, જ્યાંથી તેમને કામચલાઉ રાહત મળી હતી. આ રાહત સામે અસામ સરકારે સુપ્રીમ કોર્ટના દ્વાર ખખડાવ્યા હતા, જેની સુનાવણી દરમિયાન આજે ખેડાને રાહત આપવાનો ઇનકાર કરવામાં આવ્યો છે.
પવન ખેડા સામે આસામમાં નોંધાયેલી FIR મુજબ, તેમના પર છેતરપિંડી અને બનાવટી દસ્તાવેજાેના ઉપયોગ જેવા ગંભીર ગુનાઓનો આરોપ છે. આસામ પોલીસના જણાવ્યા અનુસાર, ખેડાએ અસામના મુખ્યમંત્રી હિમંત બિસ્વા સરમાના પત્ની રિનીકી ભુયાન પાસે ત્રણ દેશોના(UAE, ઇજિપ્ત અને એન્ટિગુઆ-બાર્બુડા) પાસપોર્ટ અને વિદેશમાં અપ્રમાણસર મિલકતો હોવાના ખોટા અને અપમાનજનક આક્ષેપો કર્યા હતા.
પોલીસનો દાવો છે કે આ આક્ષેપો કરવા માટે પાકિસ્તાની સોશિયલ મીડિયા ગ્રૂપ દ્વારા પૂરા પાડવામાં આવેલા બનાવટી મટીરિયલનો ઉપયોગ કરવામાં આવ્યો હતો. આ ઉપરાંત, જામીન અરજી સાથે સબમિટ કરવામાં આવેલા દસ્તાવેજાેમાં પવન ખેડા અને તેમના પત્નીના ઓળખ પત્રોની વિગતોમાં વિસંગતતા હોવાનું પણ પોલીસે નોંધીને આ મામલે કસ્ટોડિયલ ઇન્ટરોગેશનની માંગ કરી છે.
