પાંચમી વન-ડેમાં ટીમ ઈન્ડિયાની જીત સાત વર્ષ પછી ભારતે ન્યૂઝીલેન્ડમાં જીતી સીરિઝ પાંચમી વનડેમાં ન્યૂઝીલેન્ડની ટીમ ૧૮૭ રનમાં ઓલઆઉટ, ભારતે ૨૨ રનથી મેળવી રોમાંચક જીત. ભારતે ન્યૂઝીલેન્ડ સામે પાંચમી વનડે મેચમાં જીત મેળવી છે. માઉન્ટ માઉંગાનુઈના બે ઓવલ ખાતે રમાયેલી આ મેચમાં ટોસ હારીને પહેલા બેટિંગ કરવાનો ર્નિણય લેનાર ટીમ ઈન્ડિયા ફક્ત ૨૦૯ રન જ બનાવી શકી હતી. એક સમયે ન્યૂઝીલેન્ડનો સ્કોર બે વિકેટે ૮૨ રન હતો. એવું લાગતું હતું કે કિવીઝ સરળતાથી મેચ જીતી જશે અને શ્રેણી ૨-૨થી બરાબર કરશે, પરંતુ ભારતીય બોલરોએ બાજી પલટી દીધી. કિવીઝ ૧૮૭ રનમાં ઓલઆઉટ થઈ ગયા. ભારતે પાંચમી વનડે ૨૨ રનથી જીતીને પાંચ મેચની શ્રેણી ૩-૧થી જીતી લીધી. સાત વર્ષ પછી ન્યૂઝીલેન્ડમાં ભારતનો આ પહેલો વનડે શ્રેણી વિજય છે. ટીમ ઈન્ડિયાએ છેલ્લી વખત ૨૦૧૮-૧૯માં ન્યૂઝીલેન્ડમાં પાંચ મેચની વનડે શ્રેણી ૪-૧ના માર્જિનથી જીતી હતી. સાત વર્ષ પછી કિવીઝે ઘરઆંગણે વનડે શ્રેણી પણ ગુમાવી હતી. અર્શદીપ સિંહ અને મોહમ્મદ સિરાજ ભારતની જીતના હીરો હતા. અર્શદીપે ત્રણ વિકેટ લીધી જ્યારે સિરાજે બે વિકેટ લીધી. અર્શદીપે એકલા હાથે ન્યૂઝીલેન્ડના ટોચના ક્રમને આઉટ કર્યો હતો. તેણે વિલ યંગ (૨૨), ક્રિશ્ચિયન (૧૬) અને નિક કેલી (૨૪) ને આઉટ કર્યા. ત્યારબાદ સિરાજે ફિન એલન (૦૧) અને ટિમ સીફર્ટ (૧૪) ને આઉટ કર્યા હતા. ૨૧૦ રનના લક્ષ્યનો પીછો કરતા કિવી ટીમની શરૂઆત નબળી રહી. તેમની પહેલી વિકેટ ૨૬ રન પર પડી. ટિમ સીફર્ટ ૨૧ બોલમાં ૧૪ રન બનાવીને આઉટ થયો, જેમાં બે ચોગ્ગાનો સમાવેશ થાય છે. ત્યારબાદ વિલ યંગ અને નિક કેલીએ ૩૮ રનની ભાગીદારી કરી હતી. યંગે ૪૨ બોલમાં ૨૨ રન બનાવ્યા અને ત્રણ ચોગ્ગા સાથે આઉટ થયા હતા. ત્યારબાદ કેલીએ ૪૫ બોલમાં ૨૪ રન બનાવ્યા, જેમાં બે ચોગ્ગાનો સમાવેશ થાય છે. ન્યુઝીલેન્ડ એક સમયે બે વિકેટે ૮૨ રન બનાવી ચૂક્યું હતું પરંતુ પછી ૮૩ રનમાં ચાર વિકેટ ગુમાવી દીધી. ડીન ફોક્સક્રોફ્ટ અને માઈકલ બ્રેસવેલે ૩૬ રનની ભાગીદારી કરીને જવાબદારી સંભાળી. જાેકે, ભારતીય બોલરોએ તેમના સેટ ફોર્મ છતાં બંનેને આઉટ કર્યા. ફોક્સક્રોફ્ટે ૪૨ બોલમાં ૩૧ રન બનાવ્યા અને બ્રેસવેલે ૩૩ બોલમાં ૧૯ રન બનાવ્યા. ન્યૂઝીલેન્ડની પાંચમી વિકેટ ૧૧૯ રન પર પડી અને તેમની છઠ્ઠી વિકેટ પણ ૧૧૯ રન પર પડી હતી. ત્યારબાદ મિશેલ સેન્ટનર અને ક્રિશ્ચિયન ક્લાર્કે ૩૯ રન ઉમેર્યા. સેન્ટનરે ૩૧ બોલમાં ૨૪ રન બનાવ્યા, જેમાં એક ચોગ્ગો અને બે છગ્ગા ફટકાર્યા હતા. ક્લાર્ક ૩૫ બોલમાં ૧૬ રન બનાવીને આઉટ થયો હતો. ન્યૂઝીલેન્ડનો સ્કોર હવે ૧૫૮-૬ થી વધીને ૧૬૧-૮ થઈ ગયો હતો. ત્યારબાદ બ્લેર ટિકનર અને ડફીએ ૨૦ રન ઉમેર્યા જેનાથી ન્યૂઝીલેન્ડની આશાઓ ફરી જીવંત થઈ હતી. ટિકનર ૧૪ અને ડફી ૯ રન બનાવીને આઉટ થયા હતા. આ પહેલા ભારતીય ટીમ ૪૨.૧ ઓવરમાં ૨૦૯ રનમાં ઓલઆઉટ થઈ ગઈ. ભારત માટે અક્ષર પટેલે ૫૫ બોલમાં ૪૬ અને ઇશાન કિશને ૫૮ બોલમાં ૪૬ રન બનાવ્યા. રોહિત શર્માએ ૭ રન અને વિરાટ કોહલીએ ૫ રન બનાવ્યા. કેપ્ટન શ્રેયસ ઐયરે ૨૨ રન અને નમન ધીરે ૨૨ રન બનાવ્યા હતા. અંતે અર્શદીપ સિંહે ૪ બોલમાં ૧૪ રન અને મોહમ્મદ સિરાજે ૨૦ બોલમાં મહત્વપૂર્ણ ૧૪ રન બનાવ્યા. બંનેએ સ્કોર ૧૮૩-૯ થી ૨૦૯ સુધી પહોંચાડ્યો હતો.
