ગત વર્ષે બોર્ડ દ્વારા વેકેશનની શરૂઆત પહેલા ફોર્મ ભરવાના શરૂ કર્યાં હતા ધો.૧૦, ૧૨ની પરીક્ષા વહેલી છતાં હજુ કાર્યક્રમ જાહેર કરાયો નથી ગત વર્ષે દિવાળી વેકેશન પહેલા કાર્યક્રમ જાહેર કરવા સાથે ફોર્મ ભરવાના પણ શરૂ કરી દેવાયા હતા ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ધોરણ-૧૦ અને ૧૨ની બોર્ડની પરીક્ષા ગત વર્ષની જેમ આ વખતે પણ ફેબ્રુઆરી માસમાં જ શરૂ કરવામાં આવનાર છે. પરંતુ બોર્ડ દ્વારા અન્ય કામગીરી જેમાં પરીક્ષાનો કાર્યક્રમ તથા ફોર્મ ભરવા માટેની કાર્યવાહીમાં વિલંબ થઈ રહ્યો હોવાનું જાેવા મળી રહ્યું છે. ગત વર્ષ કરતા આ વખતે એક દિવસ વહેલા પરીક્ષા શરૂ કરવામાં આવનાર છે, પરંતુ હજુ સુધી બોર્ડ દ્વારા પરીક્ષાનો કાર્યક્રમ જાહેર કરાયો નથી. ઉપરાંત ફોર્મ ભરવાની કાર્યવાહી પણ શરૂ કરવામાં આવી નથી. ગત વર્ષે બોર્ડે દિવાળી વેકેશન પહેલા જ પરીક્ષાનો કાર્યક્રમ જાહેર કરી દીધો હતો અને ફોર્મ ભરવાની કાર્યવાહી પણ શરૂ કરી દીધી હતી. જેથી હવે દિવાળી વેકેશન પૂર્ણ થયા બાદ જ ફોર્મ ભરવાની કાર્યવાહી શરૂ થાય તેમ લાગી રહ્યું છે. પ્રાપ્ત માહિતી અનુસાર, ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા અત્યાર સુધી ધોરણ-૧૦ અને ૧૨ ની બોર્ડની પરીક્ષા માર્ચ માસમાં લેવાતી હતી. પરંતુ બોર્ડની ગત પરીક્ષા માર્ચના બદલે ફેબ્રુઆરીમાં શરૂ કરવામાં આવી હતી. જેને જાળવી રાખતા બોર્ડ દ્વારા આગામી પરીક્ષા પણ ફેબ્રુઆરી માસમાં જ લેવાનું આયોજન કરાયું છે. શિક્ષણ બોર્ડ દ્વારા વર્ષની શરૂઆતમાં જાહેર કરવામાં આવેલા એકેડમિક કેલેન્ડર અનુસાર, 
શિક્ષણ બોર્ડની આગામી ધોરણ-૧૦ અને ૧૨ની પરીક્ષા ૨૬ ફેબ્રુઆરીથી શરૂ કરવામાં આવશે અને ૧૬ માર્ચના રોજ આ પરીક્ષા પૂર્ણ થશે. જ્યારે છેલ્લી પરીક્ષા બોર્ડ દ્વારા ૨૭ ફેબ્રુઆરીથી શરૂ કરવામાં આવી હતી. આમ, આગામી પરીક્ષા એક દિવસ વહેલા લેવામાં આવશે. આમ, આ વખતે પણ બોર્ડ દ્વારા ફેબ્રુઆરી માસમાં જ પરીક્ષા લેવામાં આવનાર હોવા છતાં કામગીરીમાં ઢીલાશ દાખવવામાં આવી રહી હોવાનું જાણવા મળે છે. બોર્ડ દ્વારા હજુ સુધી ધોરણ-૧૦ અને ૧૨ની પરીક્ષાનો કાર્યક્રમ પણ જાહેર કર્યાે ન હોવાનું જાણવા મળે છે. છેલ્લી પરીક્ષા માટે બોર્ડ દ્વારા ૧૫ ઓક્ટોબર, ૨૦૨૪ના રોજ પરીક્ષાનો કાર્યક્રમ જાહેર કરી દીધો હતો. આ ઉપરાંત બોર્ડ દ્વારા ગતવર્ષે દિવાળી વેકેશન શરૂ થાય તે પહેલા જ ધોરણ-૧૦ અને ૧૨ના ફોર્મ ભરવાની કાર્યવાહી પણ શરૂ કરી દેવામાં આવી હતી. ગત વર્ષે ધોરણ-૧૦ અને ધોરણ-૧૨ સાયન્સના ફોર્મ ભરવાની કાર્યવાહી ૨૨ ઓક્ટોબર તેમજ ધોરણ-૧૨ સામાન્ય પ્રવાહના ફોર્મ ભરવાની કાર્યવાહી ૨૪ ઓક્ટોબરથી શરૂ કરવામાં આવી હતી. જ્યારે સ્કૂલોમાં ૨૮ ઓક્ટોબરથી દિવાળી વેકેશનનો પ્રારંભ થયો હતો. આમ, ગત વર્ષે બોર્ડ દ્વારા વેકેશનની શરૂઆત પહેલા જ ફોર્મ ભરવાની કાર્યવાહી પણ શરૂ કરી દીધી હતી. જાેકે, ચાલુ વર્ષે રાજ્યની સ્કૂલોમાં ૧૬ ઓક્ટોબરથી દિવાળી વેકેશનનો પ્રારંભ થઈ ચુક્યો છે ત્યારે બોર્ડે હજુ સુધી પરીક્ષાનો કાર્યક્રમ જાહેર કર્યાે નથી અને બોર્ડની પરીક્ષા માટેના ફોર્મ ભરવાની કાર્યવાહી પણ શરૂ કરી ન હોવાનું જાણવા મળે છે. આમ, આ તમામ પરિબળો જાેતા હવે રાજ્યમાં ૨૧ દિવસનું દિવાળી વેકેશન પૂર્ણ થયા બાદ જ બોર્ડ દ્વારા ફોર્મ ભરવાની કાર્યવાહી શરૂ કરવામાં આવશે તેમ લાગી રહ્યું છે. જાેકે, હાલમાં સ્કૂલો દ્વારા ગમે ત્યારે ફોર્મ ભરવાની કાર્યવાહી શરૂ થઈ શકે તેમ હોવાથી વિદ્યાર્થીઓ પાસેથી ફોર્મ ભરવા માટેની જરૂરી વિગતો એકત્ર કરી લીધી હોવાનું જાણવા મળે છે.
