ચીનને હરાવી ૪૪ વર્ષ બાદ જીત્યો ગોલ્ડ ભારતીય મહિલા હોકી ટીમે એશિયાડમાં ગોલ્ડ મેડલ જીત્યો એશિયન ગેમ્સનો ફાઇનલ મુકાબલો ભારત અને ચીનની મહિલા હોકી ટીમો વચ્ચે રમાયો હતો : ભારતીય ટીમે ફાઇનલ મેચમાં ચીનને ૧-૦ થી હરાવ્યું
એશિયન ગેમ્સ ૨૦૨૬ નો આજે ૨ ઓક્ટોબરના રોજ ૧૩મો દિવસ છે. ભારતીય વુમન્સ હોકી ટીમે એશિયન ગેમ્સમાં ૪૪ વર્ષ પછી ગોલ્ડ મેડલ જીતી લીધો છે. ટીમે ફાઇનલમાં ચીનને ૧-૦ થી હરાવ્યું છે. ભારત માટે એકમાત્ર ગોલ લાલરેમસિયામીએ કર્યો. આ પહેલાં ભારતે ૧૯૮૨માં સાઉથ કોરિયાને હરાવીને ગોલ્ડ જીત્યો હતો. આજની જીત સાથે જ ભારતીય વુમન્સ હોકી ટીમ ઓલિમ્પિક ૨૦૨૮ માટે ડાયરેક્ટ ક્વોલિફાય થઈ ગઈ છે. આજે ભારતીય ખેલાડીઓ બોક્સિંગ, તીરંદાજી, વોલીબોલ, સેલિંગ, કેનો સ્લેલમ, હોકી, કુશ્તી, સેપક ટકરા, રગ્બી સેવન્સ, ગોલ્ફ, તાએકવૉન્ડો અને સાયકલિંગની સ્પર્ધાઓમાં પોતાનું દમખમ બતાવી રહ્યા છે. એશિયન ગેમ્સના ૧૩મા દિવસે ભારત માટે બોક્સિંગ, હોકી, આર્ચરી અને કુશ્તીમાં મેડલ્સનો વરસાદ થઈ રહ્યો છે. ભારતે શાનદાર પ્રદર્શન કરીને મેડલ ટેલીમાં આગળ વધવાનો પ્રયાસ કર્યો છે.
આ અગાઉ એશિયન ગેમ્સના ૧૨મા દિવસે એટલે કે ૧ ઓક્ટોબરે ભારતના ખાતામાં ૬ મેડલ આવ્યા હતા, જેમાં બે સિલ્વર અને ચાર બ્રોન્ઝ સામેલ હતા. રેસલર નિતેશ સિવાચે મેન્સ ૮૭ કિલોગ્રામ ગ્રીકો-રોમન કેટેગરીમાં સિલ્વર મેડલ જીત્યો હતો. જ્યારે પ્રિન્સ નોબલ અને મનુ ફ્રાન્સિસની જાેડીએ સેલિંગ (સ્કિફ ઇવેન્ટ)માં રજત પદક મેળવ્યો હતો. સ્ક્વોશમાં ભારતની મહિલા અને પુરુષ ટીમોએ બ્રોન્ઝ મેડલ જીત્યા હતા. આ સિવાય મહિલા સેલિંગ અને તીરંદાજીની કમ્પાઉન્ડ ઇન્ડિવિજ્યુઅલ સ્પર્ધામાં પણ એક-એક બ્રોન્ઝ મેડલ મળ્યો હતો.
મહિલા હોકીમાં ભારતે ઈતિહાસ રચી દીધો છે. ફાઇનલમાં ૪ વખતની ચેમ્પિયન ચીનને ૧-૦ થી હરાવીને ભારતે ગોલ્ડ મેડલ પોતાના નામે કર્યો છે. આ જીતની સાથે જ ભારતે લોસ એન્જલસ ઓલિમ્પિક્સ માટે પણ ક્વોલિફાય કરી લીધું છે.
હાફ ટાઈમ સુધી ભારત ૧-૦ થી આગળ: લાલરેમસિયામીના ગોલની મદદથી ભારતીય મહિલા હોકી ટીમે ફાઇનલના પહેલા હાફમાં ૧-૦ ની લીડ જાળવી રાખી હતી. બીજા ક્વાર્ટરમાં ચીનને પેનલ્ટી સ્ટ્રોક મળ્યો હતો, પરંતુ ગોલકીપર સવિતા પુનિયાએ શાનદાર સેવ કરીને ભારતની લીડ બચાવી લીધી હતી.
ત્રીજા ક્વાર્ટરમાં શાનદાર ડિફેન્સ: ૩૩મી મિનિટે ચીનના પેનલ્ટી કોર્નર પર નવનીત કૌરે ગોલલાઈન પર ઉત્કૃષ્ટ સેવ કર્યો હતો. ચીનના સતત હુમલાઓ સામે ભારતીય ડિફેન્સે મજબૂત દિવાલ બનીને રક્ષણ કર્યું હતું. સલીમા ટેટેએ ફર્સ્ટ રશર તરીકે બોલનો જાેરદાર પ્રહાર ઝીલ્યો હતો. સુવર્ણ ઈતિહાસ: અંતિમ ક્વાર્ટરમાં પણ ચીનને એક પણ ગોલ ન કરવા દઈને ભારતીય ટીમે ૧-૦ થી ઐતિહાસિક વિજય મેળવીને ગોલ્ડ મેડલ પર કબજાે કર્યો હતો.
ભારતને એશિયન ગેમ્સના ૧૩મા દિવસે ૬ ગોલ્ડ મળ્યા. બોક્સર અંકુશ પંઘાલે મેન્સ ૮૦ કિગ્રા વેઇટ કેટેગરીમાં ગોલ્ડ જીત્યો, તેના પહેલાં સુજીત કલકલે રેસલિંગના મેન્સ ૬૫ કિગ્રા ફ્રીસ્ટાઇલમાં ગોલ્ડ પોતાના નામે કર્યો.
શુક્રવારે બોક્સર પરવીન હુડાએ વુમન્સ ૬૫ કિગ્રા અને લવલીના બોરગોહેને વુમન્સ ૭૫ કિગ્રા વેઇટ કેટેગરીમાં ગોલ્ડ જીત્યો. આ સાથે પહેલીવાર ૩ ભારતીય બોક્સરો એક જ એશિયન ગેમ્સમાં ચેમ્પિયન બન્યા. સવારે ભારતીય મહિલા તીરંદાજી ટીમે રિકર્વ ઇવેન્ટમાં ગોલ્ડ જીત્યો હતો. વુમન્સ હોકીના ગોલ્ડ સાથે ભારતના કુલ ૧૬ ગોલ્ડ થઈ ગયા છે અને તે મેડલ ટેલીમાં પાંચમા નંબર પર છે.
