શિયાળામાં એનર્જી સરપ્લસનું કારણ ફ્રાન્સમાં અચાનક લોકો માટે કલાકો સુધી સરકારે વીજળી ફ્રી કરી દીધી તીવ્ર પવનોને કારણે પવન ફાર્મ દ્વારા વીજળીનું ઉત્પાદન વધ્યું : ન્યુક્લિયર પ્લાન્ટ પણ ૮૫% ક્ષમતા પર કાર્યરત
ફ્રાન્સમાં ૮મી ડિસેમ્બરના રોજ એક અસામાન્ય અને આશ્ચર્યજનક ઘટના જાેવા મળી હતી, જ્યાં વીજળીના ભાવ થોડા સમય માટે શૂન્ય થઈ ગયા હતા. વીજળીના ઉત્પાદનમાં વધારો થવા અને માંગમાં અચાનક ઘટાડો થવાના પરિણામે, ફ્રાન્સ સરકારે લોકોને કેટલાક કલાકો માટે વીજળી મફત આપવાનું શરુ કર્યું હતું. અહેવાલો અનુસાર, ફ્રાન્સના ડે-અહેડ માર્કેટમાં વીજળીના ભાવ શૂન્ય થવા પાછળનું મુખ્ય કારણ ‘એર એનર્જી સરપ્લસ‘ હતું. ફ્રાન્સ સહિત સમગ્ર યુરોપમાં આ દિવસોમાં શિયાળો સામાન્ય કરતાં હળવો રહે છે, જેના કારણે હીટિંગ (ગરમી મેળવવાની) માંગમાં મોટો ઘટાડો થયો. લોકોએ હીટર અને બ્લોઅર જેવા ઉપકરણોનો ઉપયોગ ઓછો કર્યો.
તીવ્ર પવનોને કારણે પવન ફાર્મ દ્વારા વીજળીનું ઉત્પાદન વધ્યું. ન્યુક્લિયર પ્લાન્ટ પણ લગભગ ૮૫% ક્ષમતા પર કાર્યરત હતા, જેનાથી ગ્રીડમાં વધુ સપ્લાય ઉમેરાયો. માંગ ઓછી અને સપ્લાય વધુ થતાં વીજળીના ભાવ શૂન્ય થઈ ગયા. નોંધનીય છે કે યુરોપમાં આવી પરિસ્થિતિઓ હવે વધુને વધુ પ્રચલિત થઈ રહી છે. ઓછી માંગના સમયગાળા દરમિયાન, રિન્યૂએબલ એનર્જી(પવન અને સૌર ઉર્જા)નું ઉત્પાદન વધવાથી વીજળીના ભાવ ઝડપથી શૂન્ય, અને ક્યારેક તો નેગેટિવ ટેરિટરીમાં પણ જઈ શકે છે.
ઉલ્લેખનીય છે કે, વર્ષ ૨૦૨૨ની ઊર્જા કટોકટી દરમિયાન યુરોપમાં ઊર્જાના ભાવોમાં તીવ્ર વધારો થયો હતો, જેના કારણે ઘણાં ઉદ્યોગો બંધ કરવાની કે વપરાશ ઘટાડવાની ફરજ પડી હતી. હવે ભાવ ૨૦૧૮ના મધ્યભાગથી તેમના સૌથી નીચા સ્તરે આવી ગયા છે.
