કેન્સરના કારણે અભિનેતા મુશ્તાક ખાન અવસાન પામ્યા સ્ટાર્સ પાસે લગ્નોમાં મ્હાલવા સમય છે અંતિમવિધિમાં હાજરી માટે નથી સોશિયલ મીડિયા પર પોસ્ટ કરાયેલા એક વીડિયોમાં મુરાદે કહ્યું કે ખાને લગભગ પચાસ વર્ષ સિનેમાને સમર્પિત કર્યા હતા
કેન્સરના કારણે ૭૫ વર્ષની વયે અવસાન પામેલા અભિનેતા મુશ્તાક ખાનની અંતિમ ક્રિયામાં હાજરી ન આપવા બદલ પીઢ અભિનેતા રઝા મુરાદે બોલીવૂડના સ્ટાર્સની ટીકા કરી છે. મુંબઈમાં થયેલી અંતિમ ક્રિયામાં મુશ્તાકના અનેક સાથીદારો હાજર રહ્યા હતા, પણ અગ્રણી સ્ટાર્સની ગેરહાજરીએ મુરાદને ઉદ્યોગની પ્રાથમિકતાઓ અને તેના એક અનુભવી કલાકાર પ્રત્યેની જવાબદારીની ભાવના પર પ્રશ્ન ઉઠાવવા પ્રેર્યા હતા.સોશિયલ મીડિયા પર પોસ્ટ કરાયેલા એક વીડિયોમાં મુરાદે કહ્યું કે ખાને લગભગ પચાસ વર્ષ સિનેમાને સમર્પિત કર્યા હતા અને તેમની સાથે કામ કરનારાઓ તરફથી સન્માનજનક અંતિમ વિદાયને પાત્ર હતા. મુરાદે આવેશમાં કહ્યું કે બોલીવૂડના મેગા સ્ટાર્સ હાઈ પ્રોફાઈલ લોકોને ત્યાં લગ્નોમાં વેઈટર તરીકે હાજરી આપવા પણ પડાપડી કરે છે પણ પોતાના સહકલાકારને અંતિમ વિદાય આપવાનો તેમની પાસે સમય નથી.મુશ્તાક ખાનને મુંબઈમાં રાજપાલ યાદવ, અનુ કપૂર, સંજય મિશ્રા, સુલભા આર્ય, મનિષ વાધવા, શહેઝાદ ખાન અને ફિલ્મ નિર્માતા અનીસ બઝમી સહિતના સાથીદારોની હાજરીમાં દફનાવવામાં આવ્યા હતા. મુરાદે પોતાના લાંબા સમયના મિત્રને ગુમાવવા બદલ શોક વ્યક્ત કરતા ખાનને એક બહુમુખી અભિનેતા, સૌમ્ય માનવી અને માનવ રત્ન ગણાવ્યા હતા.
