
ધરપકડમાં મદદરૂપ માહિતી આપનારને ઈનામ કેનેડાના ૨૫ મોસ્ટ વોન્ટેડની યાદીમાં ગોલ્ડી બરાર પ્રથમ ક્રમે માહિતી આપનારને ૨.૫૦ લાખ કેનેડિયન ડોલરનું ઈનામ; ભારતીય ચલણ મુજબ આશરે રૂ.૧.૬૩ કરોડની રકમ પંજાબી ગાયક સિદ્ધુ મૂસેવાલા હત્યા કેસમાં આરોપી તરીકે ચર્ચામાં રહેલો ગેંગસ્ટર ગોલ્ડી બરાર હવે કેનેડાના મોસ્ટ વોન્ટેડ ભાગેડુઓની યાદીમાં પ્રથમ ક્રમે આવ્યો છે. કેનેડાના બોલો પ્રોગ્રામ (BOLO Program) દ્વારા જાહેર કરવામાં આવેલી ૨૫ મોસ્ટ વોન્ટેડ આરોપીઓની નવી યાદીમાં ગોલ્ડી બરારનું નામ ટોચ પર મૂકવામાં આવ્યું છે. તેની ધરપકડમાં મદદરૂપ થાય તેવી વિશ્વસનીય માહિતી આપનાર વ્યક્તિને ૨.૫૦ લાખ કેનેડિયન ડોલર સુધીનું ઈનામ આપવાની જાહેરાત કરવામાં આવી છે. ભારતીય ચલણમાં આ રકમ આશરે રૂ.૧.૬૩ કરોડ થાય છે.ગોલ્ડી બરારનું અસલી નામ સતિન્દરજીત સિંહ છે. કેનેડાની વિનિપેગ પોલીસ તેને ૨૦ સપ્ટેમ્બર, ૨૦૨૩ના રોજ ૩૯ વર્ષીય સુખદૂલ સિંહ ગિલની હત્યાના કેસમાં શોધી રહી છે. આ હત્યા વિનિપેગના ઉત્તર-પશ્ચિમ વિસ્તારમાં આવેલા રહેણાક મકાન નજીક ગોળીબાર કરીને કરવામાં આવી હતી. આ કેસમાં ગોલ્ડી બરાર સામે ફર્સ્ટ-ડિગ્રી મર્ડર અને હત્યાનું કાવતરું ઘડવાના આરોપો હેઠળ વોરંટ જારી કરવામાં આવ્યું છે.બોલો પ્રોગ્રામ દ્વારા જાહેર કરાયેલા નિયમો અનુસાર ગોલ્ડી બરારની ધરપકડ કેનેડા અથવા અમેરિકામાં થાય અને તેની ધરપકડ તરફ દોરી જાય તેવી માહિતી મળે તો રૂ.૧.૬૩ કરોડના અંદાજિત મૂલ્ય જેટલું ૨.૫૦ લાખ કેનેડિયન ડોલર સુધીનું ઈનામ મળી શકે છે. આ ઈનામની સમયમર્યાદા ૨ નવેમ્બર, ૨૦૨૭ સુધી નક્કી કરવામાં આવી છે. આ કાર્યક્રમનો હેતુ નાગરિકોની મદદથી ફરાર આરોપીઓ અંગે પોલીસને માહિતી પહોંચાડવાનો છે. ગોલ્ડી બરારનું નામ અમેરિકાની ફેડરલ બ્યુરો ઓફ ઇન્વેસ્ટિગેશન (FBI)ની ટોપ-૧૦ મોસ્ટ વોન્ટેડ ભાગેડુઓની યાદીમાં પણ સામેલ છે. અમેરિકામાં તેની ધરપકડ અંગે માહિતી આપનારને ૧૦ લાખ અમેરિકન ડોલર સુધીના ઈનામની જાહેરાત કરવામાં આવી છે. ભારતની તપાસ એજન્સીઓ પણ તેને વિવિધ ગંભીર ગુનાના કેસોમાં શોધી રહી છે.પંજાબી ગાયક સિદ્ધુ મૂસેવાલાની ૨૯ મે, ૨૦૨૨ના રોજ પંજાબના માનસા જિલ્લાના જવાહરકે ગામ નજીક ગોળી મારીને હત્યા કરવામાં આવી હતી. આ કેસમાં ગોલ્ડી બરારનું નામ આરોપી તરીકે સામે આવ્યું છે. જાેકે, દરેક કેસમાં આરોપો અને કાનૂની સ્થિતિ અલગ છે અને આરોપ સાબિત થાય ત્યાં સુધી કોર્ટ દ્વારા દોષિત ઠરાવાયેલો માનવો નહીં. કેનેડાના અધિકારીઓએ ગોલ્ડી બરારને અત્યંત જાેખમી અને સશસ્ત્ર હોઈ શકે તેવી વ્યક્તિ ગણાવી છે. તેથી જાે કોઈને તેના વિશે માહિતી મળે તો જાતે સંપર્ક કરવાનો કે નજીક જવાનો પ્રયાસ કરવાને બદલે તાત્કાલિક પોલીસને જાણ કરવા અપીલ કરવામાં આવી છે. બોલો પ્રોગ્રામની નવી યાદીમાં હત્યા, હત્યાના પ્રયાસ સહિતના ગંભીર ગુનાઓમાં વોન્ટેડ ૨૫ વ્યક્તિઓનો સમાવેશ કરવામાં આવ્યો છે.




